epub
 
Падключыць
слоўнікі

Янка Купала

Не праспі

Спі, дзяўчына, покуль сонца

Не зайграла над хацінай;

А як сонца на аконца

Бліскі кіне — ўстань, дзяўчына!

 

Устань, зніміся, схамяніся,

Ўмыйся сочнаю расою,

Сэрцам к сонцу прытуліся,

Ветру дай гуляць з касою!

 

У сонцы віся далей, вышай,—

Паланей, красуй дзянінай,

Не пужаючыся крыжа,

Сонцу роўная дзяўчына!

 

Заіскрыся кветкай белай

На зялёнай сенажаці;

Кінь патолю думцы смелай,

Пасмы радасці снаваці...

 

Негаданай песняй-казкай

Разыграецца часіна...

З сонцам, з сэрцам, з вечнай ласкай

Не праспі вясны, дзяўчына!..

 

1911




Беларуская Палічка: http://knihi.com