epub
 
Падключыць
слоўнікі

Янка Купала

Не жалейка йграе...

Не жалейка йграе

Пад ляском за вёскай,

Не вятрок хістае

Беленькай бярозкай,—

 

Дзевачка-нябожа

Уздыхае, плача

Па сваім прыгожым

Па жыцці бядачым.

 

Жыў, любіў сіротку...

Ночкі караталі;

Песціўся з лябёдкай —

Думкі ашукалі.

 

Неслі людзі ковы:

За сваіх уняўся!..

Курганок жвіровы

Памяткай застаўся.

 

Спіць ён, небарача;

Дожджык насып мые,

А дзяўчынка плача,

А дзяўчынка ные.

 

[1906-1910]




Беларуская Палічка: http://knihi.com