epub
 
Падключыць
слоўнікі

Янка Купала

Ночцы

К табе, мая ночанька цёмная,

І к вам, мае зоранькі-кветкі,

З паклонам іду, непрытомны я,

І клічу вас, клічу за сведкі.

 

Пасведчыце, як мне тут маецца

Ў маёй адзіноце, нядолі,

Як сэрца ў грудзях разрываецца,

Як плача душа без патолі.

 

Пасведчыце там перад мілаю,

Як тутка па ёй я журбую...

Мо хоць над маёю магілаю

Я водклік ад мілай пачую.

 

К табе ж, брат мой, вецер, звяртаюся

З закляццем-прысягай такою:

На смерць і жыццё прысягаюся,

На шчасце сваё маладое:

 

Мілей мне яна і ад сонейка,

Мілей ад маіх сноў дзяціных,

Ад красак квяцістага гонейка,

Ад песень вясной салаўіных.

 

Вось гэты заклён з загаворамі,

Ты, ветру, мой шчыры дружача,

Дамчы к маёй мілай за горамі

І кінь ёй пад ногі — хай бача!..

 

1915




Беларуская Палічка: http://knihi.com