epub
 
Падключыць
слоўнікі

Янка Купала

Новая восень

Па-новаму восень палеткі

Абходзіць, глядзіць гаспадаркі...

Пайшлі аддыхаць пад паветкі,

Згуляўшы дажынкі, жнівяркі.

 

Закаўкалі каўкі на ўзвышшы,

Затрэсліся лісці ў гушчарні...

Цапы на сяле заглушыўшы,

Бушуе камбайн-малатарня.

 

Даўжэй цень кладзецца ад хатаў,

Цяжаюцца пульхна папары...

Адборныя жыта зярняты

Саджае сяўнік у гектары.

 

Віхор па кустах, па галінах

З усходу пагульвае свежы...

Дабром папаўняе спажыўным

Сячкарня сілосныя вежы.

 

У вырай сабраліся гусі,

І жораў азваўся пад небам...

Плывуць па шляхах Беларусі

Абозы чырвоныя з хлебам.

 

Асенняе сонца спакойна

Ў прасторах нямых пахаджае...

Гуляе пад сцягам чырвоным

Калгаснае свята ўраджаю.

 

1930




Беларуская Палічка: http://knihi.com