epub
 
Падключыць
слоўнікі

Янка Купала

Нуда

Будзь ты дуж, як вада,

Як жалеза, цвярды,—

Калі ж нойдзе нуда,

Ты не зможаш нуды!

 

Як благая напасць,

Атуманіць сабой

І спакою не дасць,

Аж заныеш душой,

 

Аж заплачаш душой,

Жаль ахопе такі!

І не прыйдзе спакой

Да магільнай даскі.

 

На свет будзеш глядзець

Ашалелым ваўком;

Песні ўздумаеш пець,—

Адазвешся выццём.

 

Стане пеклам жыццё,

Людзі — горш ад звярэй;

Думаць будзеш усё,

Як памерці скарэй.

 

Эй, дзянькі каратаць

Трудна з ёю, бяда!—

Не дасць ночкаю спаць

Усё гэта нуда!

 

Змуча, хоць ты вазьмі

І не пі, і не еш;

Вочы зойдуць слязьмі,

І свой лёс праклянеш.

 

Адно шчасце людзей,

Толькі змога тады,—

Калі працай сваей

Зваляць камень нуды;

 

Калі мысль адна іх

У жыцці павядзе:

Працаваць за траіх,

Каб не дацца нудзе.

 

10 сакавіка 1906




Беларуская Палічка: http://knihi.com