epub
 
падключыць
слоўнікі

Янка Купала

О.М.Пяшчынскаму

Шчыра дзякую вам за пяснярскі прывет,

Якім міла мяне прывіталі;

Так цярніста жыццё, столькі мук, столькі бед!

Вы другое жыццё паказалі:

 

Дзе шыбуюць арлы над імглой, пад імглой,

Дзе дух вольны пануе свабодна;

Песню дзіўную я чую смутнай душой

І к старонцы праношуся роднай.

 

Да папарных тых ніў, да пахіленых хат,

Да людзей тых, акрыўджаных доляй,

І да наспаў-крыжоў, пад якімі спіць брат,

Да нямых курганоў сярод поля...

 

Па ўсім гэтым блуджу думкай сцішнай сваей,

Жалем сціснецца сэрца, заб’ецца...

Ўкруг кіпіць барацьба: таго верх, хто дужэй;

Віно з кроўю мяшаецца, льецца.

 

Вочы бачаць усё, адчуваю я ўсё,

Слепа хочацца верыць парою,

Што міне сіла зла, што другое жыццё

Павядзе нас другой пуціною;

 

Што ў руках песняроў струны дрэмлючых лір

Загрымяць новай песняй народам,

І сыдзе на зямлю, зніме горасці кір

Анел радасці, славы і згоды.

 

Жычу ж такжа і вам к гэткай дзіўнай пары,

З божай іскрай жывучы сам-насам,

Польскай лірай сваёй зваць у блісках зары

І старонку маю ўспомніць часам...

 

[1906-1910]


[1906-1910]

Тэкст падаецца паводле выдання: Поўны збор твораў. У 9 т. - Т. 2. Вершы, пераклады 1908-1910. - Мн.: Маст. літ., 1996. -342 с. [4] л. іл.
Крыніца: скан