epub
 
Падключыць
слоўнікі

Янка Купала

Пад чырвонай зоркаю

Пад чырвонай зоркаю

Армія Чырвоная

Прайшла долы, горы

І лясы зялёныя,

 

Калі крывапіўцы —

Генералы царскія —

Аднавіць хацелі

Парадкі жандарскія.

 

*

Пад чырвонай зоркаю

Ад рукі зладзейскае

Кроў лілася светлая

Чырвонаармейская.

 

Гуляла, шалела

Подла інтэрвенцыя,

Француз, англічанін

Путы ўскласці меціўся.

 

*

Пад чырвонай зоркаю

Ўстаў народ працоўны

І прагнаў за моры

Бандытаў каронных.

 

Былі бітвы, бойкі

За свабоду працы,

І сцяг перамогі

Ўзняўся красавацца.

 

*

Пад чырвонай зоркаю

Армія Чырвоная

Пройдзе долы, горы

І лясы зялёныя,

 

Калі рабскі захад

Руку ўзняць захоча

На край бальшавіцкі,

На ўладу рабочых.

 

*

Інтэрвенцкім бандам

Не гуляці болей

Па савецкім буйным

Нязмераным полі.

 

Пакрыецца славай

Наша пагранічча,

Калі к абароне

Партыя пакліча.

 

Пад чырвонай зоркаю

Армія Чырвоная

Пройдзе долы, горы

І лясы зялёныя.

 

1932




Беларуская Палічка: http://knihi.com