epub
 
Падключыць
слоўнікі

Янка Купала

Перад ночкай

Змеркла. Цёмнасць агні пале

Ў зорак грамадзе:

Тайнасць жудкая — гэт, здаля

Ў свет ідзе, ідзе.

 

Дагарэла ўжо лучынка,

Спачываці час!

«Добрай ночы» спей, дзяўчынка,

Спей хоць раз, хоць раз!

 

Запей нотай, сэрцу блізкай,

Аб долі маей,

Быццам маці над калыскай,

Ты запей, запей!

 

Пей пацехай, пей разгульна,

Душы не скупі;

Мае думкі, жаль няўтульны

Ты прыспі, прыспі!

 

Спеўшы песню, ўціхамоўку,

Без трывог ані —

На плячо мне звесь галоўку

І засні, засні!

 

Цемнатой нас ночка скрые

Ад злосці людской;

Будзем сніці залатыя

Сны з табой, з табой!..

 

[1906-1910]




Беларуская Палічка: http://knihi.com