epub
 
Падключыць
слоўнікі

Янка Купала

Песняру-беларусу

Пытаеш ты, якім быць трэба

Зямлі забытай песняру?

Як у шуканні вечным хлеба

Знайсці яснейшую пару?

 

О, не хадзі к другім за радай,—

У пушчы сонца не шукай!

Дабудзь з сваёй душы ўсе праўды,

Сваіх дум, сэрца запытай.

 

Хай сэрца сэрца не баіцца,

Душа з душою хай пяе;

На думках братніх, як на скрыпцы,

Ты песні выгалась свае!

 

За родну песню будзь ваякай,

Не жджы заплаты ад людзей.

Пясняр — слуга слугі усякай,

Пясняр і цар усіх царэй!

 

Дзе зор гуляюць хараводы,

Зірні зухвала, без трывог,

Прагледзь нябесныя ўсе ходы,

Каб аж задумаўся сам Бог!

 

Падслухай шэпты зямлі-маткі,

У скарбы ўсе яе заглянь,

Каб аж пайшла весць ва ўсе хаткі,

Як з ніў найбольшую браць дань.

 

Шчаслівы ты ці нешчаслівы,

Будзі сыноў сваёй зямлі,

Над беларускай соннай нівай

Нязгаслы светач распалі!

 

Глядзі — ўскалышыцца, прачнецца

Мільённы прыспаны народ,

І вокліч славы пранясецца,

Пяснярскай славы з роду ў род.

 

Ты у сваім вянку цярністым

Убачыш міртавы вянок,

І важна слаўлен, песнярыста,

На той свет сойдзеш, як лісток.

 

Памёр пясняр.— Над белым крыжам

За годам год перабяжыць;

Няпамяць імя пяўца зліжа,

А песня будзе жыць і жыць!

 

1909




Беларуская Палічка: http://knihi.com