epub
 
Падключыць
слоўнікі

Янка Купала

Покуль сонца ўзыйдзе...

Покуль сонца ўзыйдзе,

Блудзіць цяжка ночай;

Той нас тут не крыўдзе,

Хто толькі не хоча.

 

Колькі поля, колькі

Ў тых, каму не трэба!

А ў нас гэтак мала,

Што няма і хлеба.

 

Колькі лесу, колькі,

Дзе б вокам ні кінуў!

А мы нат не маем

І на дамавіну.

 

*

Свеціць сонца,свеціць

Падчас і ў аконца,—

Бядак за слязамі

Не бача і сонца.

 

Ой, ліюцца слёзы

І ў дзяцей, і ў маткі...

Не плачце, працуйце

На чынш і падаткі.

 

Не плачце вы, дзеці,

Не плач і матуля,

Ў бядзе вас пацешыць

Ці астрог, ці куля...

 

26 ліпеня 1907




Беларуская Палічка: http://knihi.com