epub
 
падключыць
слоўнікі

Янка Купала

Прывітанне

Зноў я з вамі, са сваімі,

Мілыя сяляне!

Будзем разам спатыкаці

Ночку і світанне.

 

Станем разам у парадак

З плугам на папары

Спольна скібіну варочаць,

Нажываць загары.

 

Над работай непрыдумнай

Вясковай пакоры

Будуць здаля баяць байкі

Хвойкі, ясакоры.

 

Скіба ў скібу, гоні ў гоні

Высцелем надзіва;

Ляжа зерне, ўзойдзе колас,—

Узрастай шчасліва!

 

За плугамі за сваімі

На прасторы божым

Чыстым сэрцам, вольнай думкай

Песню-казку зложым.

 

Пойдзе плавам песня-казка

Ў свет аб нашай славе,

Дзіву дасца свет вялікі

Гэтакай праяве.

 

Хай свет знае, што патрапе

Без чужых прымусаў

Беларуса праца, сіла,

Сэрца беларуса.

 

[1906-1910]


[1906-1910]

Тэкст падаецца паводле выдання: Поўны збор твораў. У 9 т. - Т. 2. Вершы, пераклады 1908-1910. - Мн.: Маст. літ., 1996. -342 с. [4] л. іл.
Крыніца: скан