epub
 
Падключыць
слоўнікі

Янка Купала

Шчаслівасць

Мець бы мне крыллі саколія,

Мець бы мне волю зарніцаў,

К нізям не рваўся б ніколі я.

З высі б глядзеў на зямліцу.

 

Птахам свабодным пад зорамі

Лётаў бы шпарка над светам,

Па-над далінамі, горамі;

Шчасце свяціла бы мне там.

 

Вокам начніцы прагледзіста

Ў тайнаў сягнуў бы заставы,

Быў бы сам даляй нязведзістай,

Даляй свабоды і славы.

 

Песняй душы ўзрывы чыстыя

Лінуў бы ў свет на прыволле;

Слухалі б зоры агністыя,

Вецер бы ўторыў на доле.

 

Зможаны ж гібелі сілаю,

Век рвучысь далей і далей,

Хмарка была б мне магілаю,

Зоры памінкі б спраўлялі.

 

Вось і па смерці з зямліцаю

Знацца не трэба ўжо будзе...

Быці, ой, гэтак! — крыніцаю

Радасць плыла бы мне ў грудзі.

 

Дуньце ж, о віхры прывольныя!

Путаў не дайцеся сіле,

Вырвіце думкі нядольныя,

Дайце мне волю і крылле!

 

[1906-1910]




Беларуская Палічка: http://knihi.com