epub
 
Падключыць
слоўнікі

Янка Купала

Сявец

На заўтра, к налеццю

Свой сею загон,—

Ад бацькі прыкмеціў

Так сеяць, як ён.

 

Лубянку-сявалку

Дзед сплёў мне даўно,

Ў сявалцы без малку

Бурштын-сам зярно.

 

Знаток сваёй рэчы,

Іду к старане,

Каб вецер у плечы,

Не ў вочы, дзьмуў мне.

 

Прывычнаю жменяй

Зярняты кладу,—

Дзе болей, дзе меней

Сляджу на хаду.

 

Сляджу, каб абсевак

Не кінуці дзе,

Бо з ім неспадзевак

Благіх шмат ідзе.

 

Кулёвай саломай

Дасеў прысцялю,

Ад злога залому

Сяўбу бласлаўлю.

 

Ляжыце, зярняты,

Ў парадак, у рад,

Усходзьце багата,

Каб сейбіт быў рад.

 

Абходзь ты наўкола

Рунь, Юр’я святы!

Ты, добры Мікола,

Пільнуй ад слаты.

 

Дай, хмарка-вясёлка,

Жывучай расы,

Маланкай-агнёўкай

Не зводзі красы.

 

Свой град, Градавіца,

Ў пару сутрымай;

Пярун, Грамавіца,

Ў жніво сунімай!

 

1918




Беларуская Палічка: http://knihi.com