epub
 
Падключыць
слоўнікі

Янка Купала

Сонцу

Ой ты, маё сонца,

Як жа свеціш ясна!

Дзе ж было раней ты,

Як быў я няшчасны?

 

Як я ў малалецтве

Радасці не ведаў,

Як за мной пляліся

Бяда, гора следам.

 

Як бацьку хаваў я,

Выбітага з сілаў,

Як яго магілу

Паводка размыла.

 

Як ішоў маркотны,

Не знаўшы дарогі,

Абіваць з паклонам

Панскія парогі.

 

Як у адзіноцтве

Бадзяўся па свеце,

Як моладасць згібла

У самым расцвеце.

 

Ой ты, маё сонца,

Як жа свеціш ясна!

Дзе ж было раней ты,

Як быў я няшчасны?

 

1935




Беларуская Палічка: http://knihi.com