epub
 
падключыць
слоўнікі

Янка Купала

Ты мне песню спей, дзяўчына...

Ты мне песню спей, дзяўчына,

Як у пана ты служыла,

Чаму смутна, бедачына,

Накрыж ручанькі злажыла?

 

Уставала рана,

Лажылася позна

І ў сне чула панаў

Голас хрыплы, грозны.

 

З горкай, цяжкай долі,

У пякельнай нетры,

Як былінка ў полі,

Гнулася ад ветру.

 

Ты мне песню спей, дзяўчына,

Як ты пану жыта жала,

Як згібала крукам спіну

І аб чым тады спявала.

 

Ой, цяжка дзяўчыне

Жаць поле чужое,

На марнае гіне

Жыццё маладое.

 

Ой, цяжка днём, ночай

Рабіці на пана,

Ліць слёзы дзявочы

Ад рана да рана.

 

Ты мне песню спей, дзяўчына,

Як цябе за тваю працу

На бадзянне сірацінай

Выгнаў пан зімой з палаца.

Ты мне спей!..

 

1939


1939

Тэкст падаецца паводле выдання: Купала Я. Поўны збор твораў. У 9 т. Т. 5. Вершы, пераклады 1930 - 1942. Мн., Маст. літ., 1998. -278 c. [4] л. іл.
Крыніца: скан