epub
 
падключыць
слоўнікі

Янка Купала

Ты прыйдзі...

Ты прыйдзі ка мне вясною,

Кветкаю прыйдзі;

Зацвіці красой са мною,

Думку разбудзі...

 

Ты прыйдзі ка мне улетку,

Коласам прыйдзі;

Песняй жніўнай на палетку

Думку саладзі...

 

Ты прыйдзі ка мне зімою,

Сонейкам прыйдзі,

Даўнай казкай залатою

Думку абудзі...

 

Ты прыйдзі ка мне увосень,

Зоркаю прыйдзі;

Ў свет далёкі з шумам сосен

Думку павядзі...

 

Ты прыйдзі і на магілкі,

Кветкаю прыйдзі;

Белай ручкай клён няхілкі

Шчыра пасадзі...

.............................

Ты прыйдзі...

 

1911


1911

Тэкст падаецца паводле выдання: Поўны збор твораў. У 9 т. - Т. 3. Вершы, пераклады 1911-1914. - Мн.: Маст. літ., 1997. -342 с. [4] л. іл.
Крыніца: скан