epub
 
падключыць
слоўнікі

Янка Купала

Ўсюды лета...

Ўсюды лета, лета,

Гулі строіць сонца,

Шалясціць зялёны

Колас на саломцы.

 

Выйдзі, закрасуйся,

Як зара да ўсходу,

Пакажыся свету,

Свету ды народу!

 

І з праменняў яркіх,

Яркіх, зіхацістых,

Ты сатчы апратку,

Як бы з кос агністых.

 

З васілёчкаў сініх,

З муравы зялёнай

Ты спляці вяночак,

Ты спляці карону.

 

Ў серабрысты росы,

Бы ў брыльянты тыя,

Ты ўцвяці убор свой,

Шаты залатыя.

 

Заясней, зардзіся

У славе неразвеўна,

Нібы дзіва тое —

Ў казцы каралеўна.

 

Пакажыся свету,

Свету ды народу,

Родная старонка,

Як зара да ўсходу!

 

1913


1913

Тэкст падаецца паводле выдання: Поўны збор твораў. У 9 т. - Т. 3. Вершы, пераклады 1911-1914. - Мн.: Маст. літ., 1997. -342 с. [4] л. іл.
Крыніца: скан