epub
 
Падключыць
слоўнікі

Янка Купала

З асенніх напеваў

Не гудзі так, восень,

Непагодай дзікай;

Не крываўся, сэрца,

З нядолі вялікай.

 

Цяжанька марнеці

Ў жыцця паняверцы;

І восень на свеце,

І восень на сэрцы.

 

Штогод вясну бачым,

Гуляючы ў полі,

Дый вясны на сэрцы

Не знаў я ніколі.

 

Не даў ты мне, Божа,

Зазнаць шчасця, волю,—

Забяры ж ты, Божа,

І маю нядолю.

 

Моладасць, вясёласць

Не жылі са мною;

Пейце ж хоць вы, песні,

З няшчаснай душою.

 

Не гудзі так, восень,

Непагодай дзікай;

Не крываўся, сэрца,

З нядолі вялікай.

 

[1905-1907]




Беларуская Палічка: http://knihi.com