epub
 
Падключыць
слоўнікі

Янка Купала

З табою

З табою спаткаліся ў лесе;

Багун і чарнобель к нам слаўся.

Смяяўся пушчар, а у смесе

За ценем цень новы снаваўся.

 

За намі, прад намі снавалі

Павучныя, бледныя цені,—

Мяне у палац зазывалі,

Цябе — у святыя прадсені.

 

Святая пасцель небасхіла

Крывавай імглой заплывала,

Пасад заручальны магілай

Пуціна сляпая хавала.

 

Пуціна была, мы і тую

Згубілі, як лепей — не зналі:

Ці маем шукаці старую,

Ці к новай блукаціся далей?

 

1911




Беларуская Палічка: http://knihi.com