epub
 
падключыць
слоўнікі

Янка Купала

За свабоду сваю

За свабоду сваю

Ўсёй душой пастаю;

У агонь, у ваду

Я за ёю пайду.

 

Лепей сам сябе дам

Пахаваці людзям,

Як свабоду хаваць,

Злыбядзе аддаваць.

 

Ў сэрцы, ў думках сваіх

З самых лет маладых

Я яе ўзгадаваў

І сваёю назваў...

 

Гэй, ты, гэй, вецер, пей

А свабодзе маей!

Гэй, ты, гэй, бор, шумі,

А свабодзе грымі!

 

Гэй, ты, сонца, гары

Ад зары да зары,

Ланцугі распалі

Па ўсёй чыста зямлі!..

1911


1911

Тэкст падаецца паводле выдання: Поўны збор твораў. У 9 т. - Т. 3. Вершы, пераклады 1911-1914. - Мн.: Маст. літ., 1997. -342 с. [4] л. іл.
Крыніца: скан