epub
 
Падключыць
слоўнікі

Янка Купала

Жняя

Як сама царыца

Ў залатой кароне,

Йдзе яна ў вяночку

Паміж спелых гоняў.

 

З каласкоў вяночак —

Моладасці сведка —

На ёй зіхаціцца,

Як у садзе кветка.

 

На грудзях шчаслівых

Каптанок ружовы,

У руцэ сярпочак

Зублены, сталёвы.

 

Вецер абнімае

Стан яе дзявочы,

Сонца ёй цалуе

Шыю, твар і вочы.

 

Каласкі хінуцца

Перад ёй паклонна,

Дзівіцца ігруша

На мяжы зялёнай.

 

А яна — царыца —

Весела, шчасліва

Карануе песняй

Залатое жніва.

 

Смела йдзе у сонцы

Ўся сама — як сонца,

Гэта жнейка наша

У нашаей старонцы.

 

1911




Беларуская Палічка: http://knihi.com