Зорны сіні плашч адзеў на плечы
І спакойна на сады ідзе
Беларускі цёплы добры вечар,
Зоры запаліўшы на вадзе.
Ціха дрэмлюць у задуме пожні,
Парна дыша ўзораны папар,
Шчасна шэпча штосьці колас кожны,
Месяц чоўнам плавае між хмар.
Дзень прайшоў гарачай творчай працы,
Велічных народных перамог,
Вырастаюць вёскі і палацы,
Новых вуліц роўны шлях пралёг.
Мы - тварцы жыцця! Шляхамі тымі
Пойдзем мы за шчасцем новых дзён,
Што крыламі ззяюць залатымі
Над пурпурам баявых знамён.
А цяпер прыйшоў наш добры вечар.
Поўны шчасных і таемных мар,
Зорны плашч накінуў ён на плечы
І асеў на ўзораны папар.
1945