Дарагі ты ў жыцці нашым госць,
Залатая пара — маладосць.
Ўсе мы помнім час радасны гэты,
Калі сэрца натхненнем гарыць,
Калі сіла ў жылах бурліць
І не ўсе яшчэ песні прапеты.
Ўсё, што ў свеце найлепшага ёсць,
У табе гэта ёсць — маладосць.
Помню ўзлёты дум светлых і чыстых
І імкненні гарачай душы,
Прага ведаў і прага спяшыць
Да крыніцы пазнання празрыстай.
А цяпер — ўсе багацці свае
Маладосці душа аддае,
Вопыт наш даць патомкам мы рады.
Ўсе вялікія продкаў дары —
Ты ідзі і ўсім сэрцам бяры,
Наш шчаслівы, багаты нашчадак.
Найбагатшы наш дар — гэта мір
І свабоды бязмежная шыр,
Дасягненні высокай навукі.
Дарагой гэта ўзята цаной,
З тых багацтваў усіх — ні адно
Не далося нам проста у рукі.
Бой крывавы прыйшлося вясці,
Каб пракласці свой шлях у жыцці...
Ваявалі мы кроўю і словам.
Гэтым шляхам сягоння вядзе
Наша партыя к шчасцю людзей.
І мы к подзвігам новым — гатовы.
1959 г.