Вам — нашай светлай надзеі,
Змене жывой, яснакрылай,
Долы мы ў кветкі адзелі,
Творчай напоўнілі сілай.
Цёплай любоўю бацькоўскай
Партыя вас атуляе,
Сонцам ласкавым крамлёўскім
Ваша жыццё асвятляе.
Тое, што век здабывалі
Нашы імклівыя рукі,
Вам мы цяпер перадалі,
Нашы сыны і унукі.
Смела ж уперад! Заўсёды
Будзьце да працы гатовы,
Скіньце з дарог перашкоды,
Дзень сустракаючы новы.
А калі вораг з-за мора
Зброю забойцы уздыме,—
Будзьце надзейнай апорай
Нашай Савецкай Радзіме.
Радасць вы наша! Вам сонца
Свеціць, як нам не свяціла.
Ленінцы вы, камсамольцы,
Гордасць вы наша і сіла!
1964 г.