Наламала галін я зялёных,
Прынесла з букетам у хату.
Пахне ў хаце чаромхай, і клёнам,
І рамонкам вясновым, і мятай,
Дзень сягоння у хаце шчаслівы —
Дарагія прыехалі госці.
Льецца смех, льецца гоман шумлівы,
Быццам свята ідзе маладосці.
Па стале у пярэдняй — пілоткі,
Пяць шынеляў вісяць ля парога,
І са мною — сябры-аднагодкі,
Што ішлі па ваенных дарогах.
Сярод іх мой любімы, мой мілы,
Пылам дальніх паходаў абняты.
Добра мне: бы вясна асвятліла
Ўсе куткі маёй роднае хаты...
1953 г.