Прыляцець да вас бы звонкай песняй
У дзень Кастрычніцкага свята...
Праляцець над Сожам, над Палессем,
Над Радзімай, вольнай і багатай.
Са зваротнай хваляю сустрэчнай
Апусціцца б мне над Маладзечнам.
А затым у дом ваш, дом калгасны
Заляцець бы птушкаю крылатай,
Паглядзець, як жывяце вы шчасна,
Як святкуеце сягоння свята...
...Члены вашай дружнае арцелі
Стол святочны з радасцю абселі,
Падняліся, зазвінелі чаркі.
Просіць слова брыгадзір вусаты,
Ўсталі паляводы і даяркі,
Ордэнамі зазіхцела хата.
На пачэсным месцы ўсталі трое
З Залатымі Зоркамі — героі.
Хай цвіце Радзіма — наша маці,
Хай жыве народ — магутны волат,
Хай бытуе шчасце ў нашай хаце!
Сцяг наш ясны — Серп на ім і Молат,
Ён вядзе да шчасця ўсе народы
Шляхам міру, працы і свабоды.
Ясны дзень Кастрычніцкага свята —
Светлы лёс прынёс у нашу хату!
1965 г.