Там, дзе спелі журавіны
На падушках моху белых,
Ганабобель рос палынны
Паміж купін пасівелых;
Дзе дрыгва ў паўсне ляжала
Пад пялёнкаю туманаў,—
Там мой ранак я вітала,
Мой жыццёвы, трудны ранак.
Ў лесніковай беднай хаце,
Як пралеску напрадвесні,
Гадавала мяне маці,—
Пушча нам спявала песні.
Мы хадзілі ў журавіны,
Рвалі буйныя брусніцы,
Пад пушыстаю ляшчынай
Воду чэрпалі з крыніцы...
А цяпер там новы горад
Сігануў да звонкай высі,
На тарфянішчы азёры
Неаглядна разліліся.
Ў гэтай новай, добрай долі —
Часам толькі ў сне прысніцца:
З беднай хаты з чорнай столлю
Я, малая, йду ў брусніцы.
1956 г.