За Дунаем звоняць косы,
Ды не на пакосе.
Журавінавыя росы
Палі на калоссе.
Скачуць коні, іржуць коні,
Гнуцца ў бойцы пікі,
Звонкім звонам шаблі звоняць
У баю вялікім.
Вораг стаць хацеў багатым —
Звер і кат пыхлівы —
Папаліў ён нашы хаты,
Панявечыў нівы,
Плачуць людзі, зямля плача
Пад фашысцкім ботам...
Ды з’явіўся полк казачы
Сакаліным лётам.
Зазвінелі шаблі-косы,
Ды не на пакосе.
Журавінавыя росы
Палі на калоссе.
Неба сіне-сіне-сіне
Над чырвоным жытам.
Поле доўга не астыне,
Трупамі укрыта.
1943