Што гэта за песня там уночы? —
Нешта пра затоенасць начэй...
Пра святую праведнасць дзявочых
Сцішаных, задумлівых вачэй...
Што гэта за промень там свіціцца? —
Тоненька кладзецца на траве...
Лашчыцца ў чаротах, мітусіцца...
Човен... Быццам сам сабой плыве...
Што гэта над хваляй
б’ецца струнка? —
Быццам крылле звонкае звініць...
Нехта звіў сярэбраную ніць
Стоеным, салодкім пацалункам...
Ноч усё схавала і стаіла,—
Таямніцай чыстай ад бяды...
А кагось каханнем акрыліла,
Падарыла шчасце на гады...
1984