epub
 
Падключыць
слоўнікі

Максім Танк

Галінка і верабей

- Галінка-вярбінка, -

Прасіў верабей, -

Мо пакалыхала б

Маіх ты дзяцей?

 

Галінка не хоча

Дзяцей калыхаць.

- Ідзіце, казулі,

Галінку ламаць!

 

Казулі не хочуць.

- Ідзіце, ваўкі,

Лавіці, караці

Казуляў такіх,

Якія не хочуць

Галінку ламаць,

Якая не хоча

Дзяцей калыхаць.

 

Ваўкі не схацелі.

- Прыходзьце, стральцы,

Каб непаслухмяных

Ваўкоў правучыць,

Якія не хочуць

Казуляў караць,

Якія ляняцца

Галінку ламаць,

Якая не хоча

Дзяцей калыхаць...

 

Пайшлі паляўнічыя

Ў лес на ваўкоў:

Спалохана зверы

Пабеглі з дуброў,

Пабеглі казуляў

Лавіць і караць;

Казулі пабеглі

Галінку ламаць;

Галінка ж вярбінка

Са страху хутчэй

Давай калыхаць

Вераб'іных дзяцей.

З тых дзён без спачынку,

Каб кожны быў рад,

Калыша галінка

Усіх птушанят.

 




Беларуская Палічка: http://knihi.com