Хоць прыходзім сюды
Мы, як сціплыя госці,
Ёсць у нашай хады
Гаспадарскае штосьці.
Чуцен крок наш здаля
Сёння так, як і ўчора:
Плугара, каваля,
Песняра і шахцёра...
Што асудзім на злом,
Што скуём, што пасеем?
І дабром або злом
Наша заўтра заселім?
Мы і вы, я і ты
Перад часам падсудны:
Пакідаем масты,
Песні, зоркі і судны.
Што было — не сплыло
Днём, у быце пазбытым.
Дум і сэрцаў святло
Пакідаем арбітам.
Не палохае нас
Забыцця небяспечнасць.
Мы прыходзім на час.
Мы прыходзім на вечнасць.