Хочаце —
Пераніцую любога,
Новыя рысы надам спакваля.
Хочаце —
З вас зраблю бога.
Хочаце —
З вас зраблю караля.
І не ўсміхайцеся, калі ласка,
Я жартаваць зусім не прывык.
Я па службоваму абавязку
І па характару — чараўнік.
Калі вам сняцца чыны вайсковыя,
Калі вы з пароды гарачых задзір,
Якіх свабода цывільная скоўвае,—
Прымерайце свой генеральскі мундзір!
А вы, кірпатая, ў трэцім радзе
Станьце царыцаю хараства,
Перад якою з мальбой у паглядзе
Рыцары сцелюцца, як трава.
Каб вы пабачыць маглі ў люстэрку
Прывабнымі постаць сваю і твар,
Я клапатліва здымаю мерку
З вашых няўтольных жаданняў і мар.
Змена адзення — заўсёды падзея,
Заўсёды свята. Вядомая рэч,
Што сустракаюць нас па адзенню...
А хто не хоча добрых сустрэч?
Мастацтвам маім залюбуецца кожны:
Ходзяць, працуючы дбала на вас,
У пальцах маіх паслухмяныя ножны,
Якімі крою
Прастору і час...
Хтосьці пазычанае надзене,
І ўбачыш адразу: справа — швах.
І пачатковыя нашы надзеі
Трашчаць пачынаюць па ўсіх швах.
Таго, хто ролю чужую выконвае,
Падсцерагае сумны канец...
Гэта даводжу вам пераконана
Я —
тэатральнай майстэрні кравец.
* * *