Дзе сэнс маёй прысутнасці,
Падсуднасці ў жыцці?
Павінен я да сутнасці,
Да ісціны дайсці.
Свідруе думка суткамі —
Не там,
Не там,
Не там.
Трывожна сэрца стукае,
Шалее, як тамтам.
Ах, што там пад паверхняю,
Якая глыбіня?
Грувасткімі паверхамі
Маўклівая браня.
Чаго вам, хлопцы, ў пошуку,
Чаго, чаго, чаго?
Ці пошуму ці пошчаку
Ад пошуку свайго?
Датупаю, дастукаю,
А тэрмін праміне, Гукну:
— Сябры з наступнага,
Пазычце часу мне!
* * *