Дзень добры, неба! На цябе ізноўку
Глядзіць памаладзелы шар зямны.
Да зор далёкіх у камандзіроўку
Ляцяць яго бясстрашныя сыны.
Загаварыла вышыня нямая,
І мы пачулі ўсе яе здаля.
І вось ужо герояў абнімае
Мільёнамі братэрскіх рук зямля.
Мы ў космас насцеж расчынілі дзверы,
Каб сустракацца з зорамі часцей.
На стол бакалы, Месяц і Венера,
Рыхтуйцеся прымаць зямных гасцей!