Нервы казыча тонка,
Піхае на ўскрай самагубства
Боязь адстаць —
гонка
Амбіцыёзнага глупства.
Першынства, першынства прагнуць.
Калі цябе ў гонку ўцягнуць,
Дыстанцыю ўжо не пакінеш,
Хоць знаеш, які фініш...
Гонка —
у шторм адчальце,
Пакінуўшы бераг стромкі.
Гонка —
гараць на асфальце
Аўтамабіля абломкі.
У ліхаманкавай гонцы
Маё чалавецтва сваволіць:
Хто ўздымецца вышай за сонца,
Хто вышай калені аголіць...
У гонцы губамі тытана
Глытаеце прагна прастор вы,
Ціснучы апантана
Навыперадкі —
да прорвы...
Вы, завадатары гонкі,
Вы, трубадуры эпохі,
Годзе бабахаць у гонгі!
Дайце адстаць трохі.
* * *