У цяперашнім студэнцкім інтэрнаце на Дунайскім
узбярэжжы, дзе летам
праходзяць міжнародныя семінары
славістаў, адразу пасля вызвалення
Браціславы размяшчаўся савецкі
ваенны шпіталь.
Чаму вы не чуеце крыку?
Крычалі —
Першы і апошні раз:
— Ма-ма!
— А-а-а!
Дагэтуль не моўкне
Каменнае рэха сцен.
А вы не чуеце.
Шаноўныя знаўцы моў,
Можа, вам перакласці
Крык
на вашы родныя мовы?
Крык гучыць аднолькава зразумела
Па-руску і па-англійску,
Па-польску і па-нямецку...
Выбухі смеху.
Чаму вы не чуеце крыку?
Я ў табе,
Ты ва мне,—
Інтэрнат —
Прытулак крыку,
Прытулак смеху.
Скаланаліся сцены ад выбухаў бомб,
Сцены дрыжаць ад выбухаў смеху.
Смех, як і крык,
Гучыць аднолькава зразумела
Па-руску і па-англійску,
Па-польску і па-нямецку...
Весялосці гуллівы вірус.
Звонкай радасці феерверк.
З крыку
Смех
Вырас,
Як з падмурка паверх.