Я вас люблю,
Начныя ліхтары —
Зямныя намеснікі сонца.
Як бы позна я ні вяртаўся
Са спаткання з каханай
Ці з новай планетай,
Мяне сустракаеце вы,
Мяне праводзіце вы.
Тыя, хто вас запаліў,
Даўно адышлі ў сон;
Ды лёгка ступаю я
У акіян ночы —
Па астраўках сонца,
Па астраўках дня.
Хіба не той,
Хто вас запаліў,
Цяпер ад мяне
Адводзіць цемру,
Адводзіць страх,
Адводзіць самоту
Сяброўскімі далонямі святла?
Выводзіць з былога,
Нібы з сіла*,
Прасека ў цемры.
Калідор святла.
Дзякуй вам, ліхтары!