Калі расстаешся з богам,
Шукай да людзей дарогі.
На змену былым маналогам
Прыходзяць цяпер дыялогі.
Гэта зусім не тое,
Што словы кідаць у залу,
Якая сваёй нематою
Ці рэхам табе адказала.
Напэўна, цяжэй, чым горы,
Сэрцы людскія рухаць.
Не слухацца ў ціхай пакоры —
Вучымся чуйна слухаць.
Вы зазубрылі мастацтва
Слацца кашуляй пад прасам.
А тут трэба пытацца
І трэба адказваць часам.
Тут мусіце кеміць з ходу,
Калі прыціскаюць партнёры.
Не падаспеюць заўсёды
Класікі, як суфлёры.
У вас адгукнецца спагадна
Суседская кардыяграма.
Пачуеце вы дакладна,
Пачуюць і вас таксама!
* * *