Калі вада —
Пераплыві,
Калі бяда —
Перажыві...
Калі цяжкая навіна,
Калі мана,
Калі сцяна,
Стрывай, развей і пратарань,
Рукой уласнаю дастань
Блакіт, закрэслены ўгары
Няўмольнымі крыжамі крат,
І неба птушкам падары,
Свабоды сват,
Прасторы брат...
А зойдзе сонца за палі,
Агонь у цемры запалі,
Няхай трапеча давідна
Цяпло кастра,
Святло акна...
Адчуеш —
Ты ўладар і бог
У тым, што сам адолець змог.