Сонца на ніву
Глядзіць і глядзіць,
Яно разгарэлася гэтак,
Што нават не хоча на міг адпачыць:
У нас — гарачае лета!
Зазыўна шумяць
Каласы з вецярком,
І поўніцца гулам палетак;
Камбайнер спацелы
Сядзіць за рулём:
У нас — працавітае лета.
Мігцяць за жняяркай касынкі дзяўчат.
Красуюць узорамі кветак,
І следам — снапы залацістыя ў рад:
У нас — ураджайнае лета.
А піянеры
Старанна ў мяшкі
Збіраюць на ржышчы густым каласкі,
І сэрцы іх
Шчасцем сагрэты:
У нас — шчаслівае лета.
Машына са збожжам
Гасцінцам бяжыць —
І лісце сустрэчных бяроз аж дрыжыць,
І вецер разносіць над светам:
У нас — зайздроснае лета.
І рапарты
Перадае тэлефон
Ад ранку да позняе ночы ў раён
Па правадах
З сельсавета:
У нас — багатае лета!