Сама ты не прыходзіш да мяне,
Цябе штодзень я па радку збіраю,—
Там, дзе праходзіць плуг па цаліне,
Там, дзе жняярка у жытах нырае.
Там, дзе дваіх світанне застае.
Дзе салавей рассыпаў спеў срабрысты.
Бясконцыя сааўтары мае —
Садоўнікі, прарабы, трактарысты.
Без вас не змог бы пець і дыхаць я.
Вы гэтым вершам шлях у свет адкрылі.
Вам прывітанне песня шле мая,
Якой далі вы для палёту крыллі.