Май прынёс Перамогу.
У Маі расцвіў бэз.
У Маі прымаю трывогу,
Што тупае да парогу,
Без...
Без бацькі сын вырас.
Прыродзе наперарэз
Множыцца, быццам вірус,
Без...
Нага без нагі —
Пратэз.
Як рэха мінулага, стукае
У сэрцы і камяні.
Завея бяздомнай сукаю
Сціхла ўдалечыні.
Вуліцай у непагоду
Безвач народ ідзе.
Бездараж. Ад галалёду
Не ўратавацца нідзе.
Аўтобус, што коціцца роўна
Зачыкільгае раптоўна
І панясе, панясе
Гэтак, што ахнуць усе.
Не ўтаймаваць гайданку.
Хіба не бачыце вы,
Як крутануў баранку
Вадзіцель без галавы?
У твары пранізліва хукае,
Разбегам збіваючы з ног,
Эра бязмерных хуткасцяў,
Эра люстраных дарог.
Лёс мой — шалёны аўтобус
Без тармазоў і руля.
За паваротам,
як глобус,
Выслізнуць можа зямля...
Множыцца страшнае «без»,
Быццам бязродны бес.
Вокны без шыбы.
Свет без падзей.
Мора без рыбы.
Дом без людзей.
Без...
Без...
Без...
Бездань, як позва.
Стойце — яшчэ не позна!
* * *