На спадарожнікаў побыту
Можам абапірацца:
Робаты,
Робаты,
Робаты
Нам памагаюць у працы.
Робат праводзь між рыфаў
Лайнер у час урагана.
Робат, падкінь рыфму,
Каб загучала арганна.
Гарласта крычыць афіша:
Ах, навіна якая!
Трапеча гросмайстар Фішар —
Робат на бой выклікае.
Ты робіш поспехі, робат —
Мой электронны лёкай.
Красой аздабляючы побыт,
Як ты зайшоў далёка!
Захоплены ўласнай сілаю
Ды кемлівасцю гарэзнаю,
Спрабуеш маю мілую
Схапіць у абдымкі жалезныя.
Акрэсліўшы абавязкі,
Стварыў я цябе для работы,
А ты захацеў ласкі,
А ты захацеў пяшчоты.
Споўняць рукой крутою
Робаты з норавам простым
Тое, што просім, і тое,
Чаго мы ў іх не просім.
Ганю* з галавы стому —
На сэрцы каціны скробат...
Ды што мне думаць самому —
Няхай думае робат.
Дбаючы разам з векам
Аб электронным цудзе,
Памятай —
чалавекам
Ніхто за цябе не будзе.
* * *