Надыдзе хвіліна важная —
Паклічуць да справаздачы.
І я з хваляваннем узважваю
Удачы свае і няўдачы.
Узважваю радасць і гора.
У нейкім нервовым шале
Скачуць то ўніз, то ўгору
Напераменку шалі.
Тут поруч і гонар і горыч,
Сябры і ворагі поруч.
Шпурляюць у знак увагі
На трапяткія вагі
Адны —
мой здабытак няважкі,
Другія —
мае прамашкі.
Кладуцца чаргой нястомнаю
За промахам перамога.
І асвятляецца цёмная
Кладоўка майго былога.
Узважваў удачу, няўдачу,
Мераў глыбіні ворыва,
А падлічыў, бачу,
Толькі сяброў і ворагаў.
* * *