Нашто з гарматы біць па вераб’ю?
Хай слых кранае гукавая гама —
Хвалю я ўсю птушыную сям’ю,
Дзе верабей чырыкае таксама.
Другім пярнатым падаюць руку,
Салоўку славяць, голуба галубяць,
Будуюць дом, каб падарыць шпаку,
І толькі вераб'я ніхто не любіць.
А я гляджу з любоўю кагадзе,
Як скача ён з гарэзным спрытам хвата,
Крупінкі хлеба ў голуба крадзе —
Лянівага і сытага сабрата.
Свавольніку малому, як і я,
Аддаць і вы належнае павінны.
Не адбірайце хлеба ў вераб’я —
Падданага паветранай краіны!..