Не кінуўшы нават слова
Ні сваяку, ні суседу,
Як па вадзе, адмыслова
Прайшоў — і знік без следу.
Застаўшыся невядомым,
Не ўзнікне ў нечым паглядзе
Ні параходам, ні домам,
Ні дрэўцам на даляглядзе.
Сам у сябе на прыкмеце
Прайшоў, як скразная ўдача.
Прайшоў — і ніхто на свеце
Не ўсцешыцца і не заплача.
Умеў пазбягаць падсуднасці,
Свае перавагі ўзважыць.
Не заўважалі прысутнасці,
Адсутнасці не заўважаць.
Прайшоў, нібы пад нагамі
З шоўку была дарога.
Не зачапіў нікога,
Не ўсхваляваў нікога.
З нябачных нітак пражу
Цэлы свой век выводзіў.
Спытай — і ніхто не скажа,
Праходзіў ці не праходзіў.