На лісцях — крывавыя кроплі.
Гэта іх восень параніла.
Расплачваецца прырода
За тое, што ўлетку буяніла.
За тое, што травы з праталіны
Цягнуліся да навальніцы
І пляскалі прывітальна
Грому і бліскавіцы,
Што ў маі ўзрываў пупышкі
Зялёны агонь бунтоўны,
І дзынкалі, быццам кілішкі,
Пялёсткавыя бутоны,
За тое, што ў спёку часалі
Галіны, як грэбнем, хмары
Ды прыкрывалі часамі
Зябкія мокрыя твары,—
Час, як гандляр суровы,
Прымае за квецень плату:
Сарваных лістоў галовы
Злятаюць, нібы на плаху.
* * *