Плуг —
Усіх згаладнелых друг —
Паглыбляецца ў глебу былінна.
Плуг,
Які прыходзіць у рух,
Умываюць пясок і гліна.
Каб барозны ракой плылі,
Мы
Метал
Мудрасці вучым.
Плуг
Купаецца
У зямлі,
Плуг
Выходзіць з зямлі
Бліскучы.
Навучы вышыні, прасвятлі
Нас, аратых, айчынная глеба.
Плуг
Капаецца
У зямлі,
Здабываючы
Золата хлеба...
Каб барозны ракой плылі.
Ззяе сонцам метал гарачы...
Калі плуг перастане
Купацца ў зямлі,
З’есць яго
Іржа да астачы.