Няхай жыве рамонт!
Бразгочуць вокны, дзверы.
Рамонт, як гулкі фронт,
Праходзіць па кватэры.
Пакояў перакрой.
Спакою перакоўка.
Грымотнаю гарой
Злятае ўніз тынкоўка.
Скрыгоча цвік-прасцяк,
Якім дыван прыбіты.
Не выцягнеш ніяк,
Як мешчаніна з быту.
Ступае па двары
Пыл, як вярблюд сутулы.
Нагамі дагары —
І столікі і стулы.
Патрушчаны датла
Парадак учарашні.
Хвала табе, хвала,
Пераварот дамашні!
Як трэба страсянуць
Падчас былыя скарбы,
Каб потым удыхнуць
П'янлівасць свежай фарбы.
Вывешвае рамонт
Свае сцягі — шпалеры.
І, як бяскроўны фронт,
Праходзіць па кватэры.