Ах, і сусед мой — гурман-непаседа!
Які сямейны салат у суседа!
Крышачку вернасці,
Крышачку здрады,
Крышачку рэўнасці,
Крышку спагады...
Салат кулінару па густу,
Па сэрцу,
Прыпраўлены лаянкай густа,
Як перцам.
Ды падсалоджаны ласкай падманнай —
Казачнай маннай, што сыпле з нябёс,
Ды перасыпаны самаю таннай
Соллю жаночых пакутлівых слёз...
Ах, і сусед мой — гурман-непаседа!
Які сямейны салат у суседа!
Гатуецца ён і ноччу і днём...
Мне б па-братэрскаму праву
Перакульнуць бунтоўна ўверх дном
Гэтую агорклую страву!